“Эв мөнхийн тусгаар Монгол” нэрийн дор зохион байгуулж буй үндэсний их баяр наадмын нээлт, хаалтын үйл ажиллагааны явцтай Урлаг, соёлын салбар хорооны баг энэ сарын 6-нд танилцлаа.
Тус үзлэгийн үеэр Соёлын сайд Ч.Номин, Соёлын дэд сайд, Үндэсний их баяр наадмын Урлаг, соёлын хорооны дарга М.Батбаяр нар хүрэлцэн ирж, санал солилцов.
Цаг агаарын нөхцөл байдлаас үүдэн бэлтгэл ажил хангахад хүндрэлтэй байгаа хэдий ч одоогийн байдлаар бэлтгэл ажлын үйл явц 90 хувьтай явагдаж байна.
Ташрамд дурдахад, энэ жилийн үндэсний их баяр наадмын нээлт, хаалтын үйл ажиллагааны бүхий л шатанд хөдөлмөрийн аюулгүй байдлыг баримтлан ажиллаж, гэнэтийн эрсдэлийг тооцон уран бүтээлчдийг даатгалд хамруулж ажиллаж байгаа аж.
